Synnøve Nupen har kunstutdanninga si frå Ålesund Kunstskole og Grafikskolan i Stockholm. Ho mottok Norsk Kulturråds Debutantstipend i 2001 og er innkjøpt av Senja Næringshage og Søderleds Stadsdelsnemnd. Nupen har hatt separatutstillingar ved Galleri Nord i Finnsnes, Kafé Petit Paris i Moss og Porsgrunn og Galleri K16 i Ålesund. Ho har deltatt på fleire kollektivutstillingar, mellom anna sommarutstillinga i Ørsta Kunstlag i 2000, Sommarutstillinga hos Ta det Piano i Ålesund i 1998 og Juleutstillinga i Volda Kunstlag i 1997.

Tresnitt er favoritteknikken til Nupen. Ho har likevel laga ein motivserie med bamsar i pastell som fortel historier om dei to små borna hennar. Ho har jobba mykje med ein eigen tresnitteknikk som kallast japanske tresnitt, ein teknikk ho lærte i Stockholm. Dei japanske tresnitta er trykt på rosa bomullspapir eller kvitt rispapir, noko som gjev ein særeigen og spennande struktur og overflate til bileta. Med denne teknikken blir treplatene måla med pensel, og deretter trykt over til eit fukta papir ved hjelp av ein bambusdabb. Fordelen med japansk tresnitt er at det tørkar fort og er eit fysisk lettare arbeid enn når ein trykkjer i pressa.